Das Gebiät umfasst Vorder, Hinder und Ober Mättätal und liit underhalb vum Schpilauer Schtock. Ds Mättätal liit i dr Mitti zwischet dä beedä Bärgschtazionä Birglä-Biel und Birglä-Ruegig und gheert zum Schächätaler Heechäwäg.
Ds Wort Mättä het mit Mitti z tüä und wiist drüf hi, dass d Mättenalpä zmittst im änä groossä Alpgebiät innä ligget, wo sich vu dr Gand bis zu dä Schächätaler Windgällä erschtreckä tiänt.
Uf dä drii Alpä wird Alpchääs uf ganz verschidnigi Artä produziärt. Im obärä Mättätal wird züäsätzlich nu Gäiss-Chääs fabriziärt.
«Uf em Eschtrich vumänä Chääsgadä i dr Mättenalp het äinisch äs Ughiir gläbt, allerdings äs bsunders nätts: Wenn d Älpler üfgfahrä siget, häig äs frehlich gsungä, und wenn si vu Alp ggangä siget, häig äs himeltrüürig ghiiwlet.»
Ürner Sagäwält